雖然財政司司長曾俊華唔認，但佢疑似被跣之後，特首梁振英噚日居然話「不至到要拒絕（正被覆核的）呢4位議員嘅提問」，仲話「我哋好重視行政立法關係」。原來越接近特首選舉，CY就會變得越詼諧，連呢啲說話都講得出，但其實又有乜咁出奇……
5年前嘅《星島日報》喺狙擊CY方面不遺餘力，甚至派出女記者出擊搞到CY嬲嬲豬，除咗鬧爆女記者做法令佢尷尬，仲話希望選舉係君子之爭云云。但佢5年前今日就改口話自己唔係針對前線記者，相信對方只係進行被要求嘅工作，而佢係主動受訪喎。
睇番當年吖，佢被追訪時根本冇答問題，何來主動受訪？反而唐唐做慣官、老早適應被追問，5年前今日話「記者要大聲發問，係因為經常會有好多人同時發問，如果唔夠大聲，受訪者就聽唔到問題」。雖然有人笑唐唐係豬，但至少講人話。