唔少高官都會向友好發送聖誕卡，八方今年收到財爺曾俊華電郵嘅e-card（圖），就特別覺得喺呢個決戰689嘅時刻，別具睇頭，皆因張卡用佢養咗近8年、佢稱為小霸王嘅日本柴犬做主角。
其實財爺用愛犬做賀卡主角已非首次，佢2009年因為急性心臟病發而入院通波仔後，由於獲唔少朋友同市民傳來慰問卡，佢就首次用呢隻柴犬做主角，特別製作一張網上感謝卡向各界致謝，相當有心思。
嗰年財爺透露過，呢隻愛犬Oliver係佢屋企最活潑、最好動同最貪吃嘅成員，係佢2008年送畀囡囡曾文心嘅聖誕禮物，仲透露愛犬除咗食嘢，最鍾意係玩追網球喎，由於一直有運動，所以身材都好fit咁話喎。