呢個世代做網絡紅人真係可以好簡單，只要你夠索同夠出位，見報真係話咁易。好似禮拜日愛華頓對曼聯場波，鏡頭影到有個着住車路士褸嘅女球迷，即刻引起網上討論。
法比仔避過秋後算賬
經過英國方面嘅網絡起底，原來呢位女球迷叫Emily Rogawski（箭嘴示），係由美國嚟利物浦讀書嘅留學生。佢話自己係忠實車迷，但見愛華頓對曼聯咁精采，又搵到張平飛，所以周日決定入場睇波。佢話自己冇乜冬天衫，焗住着件車仔褸入場。網民仲好快搵到佢嘅ig，發現佢間中都會上載啲性感相（右圖）。唔知如果下次港超聯南傑大戰，有個索女球迷着住件東方波衫睇波，會唔會都可以見報呢？有興趣嘅朋友可以試吓。
另外上周六曼城對車路士餘波未了，英足總會追究兩隊唔好好管束球員，但相信都係罰款了事；至於挑釁費蘭甸奴嘅法比加斯就走得甩，唔會被秋後算賬。
