周三晚(7日)國際騎師錦標賽，莫雅4匹座騎之中，「事勝意」同「美麗鉅星」都係當銳份子，而「肇慶威威」今季未上過名，但連仗輸得唔遠，配上天下第一高手莫雅，都唔好睇低。
莫雅有幾犀利毋須多講，但佢有一個超級盲門數據，就係從未贏過大摩戰馬，兩個馬圈重量級人物同樣姓Moore，居然擦唔出火花。莫雅喺騎師賽尾關第八場三班1650米，抽到大摩嘅「美麗鉅星」，大摩表明一啲都唔在乎兩人未合作贏過呢個數據，仲好淡然話數據只係一堆數字，唔代表啲乜。
大摩說：「我覺得自己好好運，『美麗鉅星』抽到世上最出色嘅騎師，隻馬一連兩場跑谷草一哩，潘頓發揮得好好，呢兩場得一亞一季，都只輸一條頸位，只係唔夠運。『美麗鉅星』係英國4歲馬，同好多北半球馬一樣需要時間成長，家陣先開始踏黃金期，我預期佢不斷進步。」
「美麗鉅星」今季初出喺田草力壓「翡翠紅星」贏馬，「翡翠紅星」其後3戰取得2冠1亞，升上2班86分，以呢個賽績計，「美麗鉅星」現時喺3班77分，真係份量十足，話唔定雙Moore合作，就憑呢隻攜手入凱旋門。