微軟創辦人蓋茨臨近聖誕都鍾意送大禮，佢唔係貼股票，而係推薦五本好書，擺明塞錢入大家袋。蓋茨喺網站Gatesnotes貼出書評，又喺一段兩分半鐘嘅動畫「聲音導航」，話畀大家知幾本書有幾正，大家係時候培養億萬富豪內涵了。
61歲嘅蓋茨喺個人網站Gatesnotes寫文超過六年，除咗寫書評，旅遊、個人生活經歷同基金活動乜都寫。多年來，蓋茨堅持唱好閱讀習慣，保持一個禮拜讀一本書。今年蓋茨推薦以下五本好書，題材由運動到基因學，樣樣有齊。
蓋茨推薦嘅五本好書，包括《String Theory》、《Shoe Dog》、《The Gene》、《The Myth of the Strong Leader》同《The Grid》。
本身鍾意打網球嘅蓋茨，推介美國作家David Foster Wallace寫嘅網球論文，大讚作者嘅筆鋒好似瑞士球王費達拿咁勁，唔識打波嘅人都啱睇，最重要係，坐火車、飛機時拎起呢本書，望落夠晒sharp醒。