諸葛紫岐曾力捧旗下性感女星莊端兒，可惜呢對賓主今年9月擘面，莊端兒喺記招上聲稱8月已向諸葛發律師信，單方面提出解約，佢當時爆料指所有事發生喺自資出寫真集之後，其中喺接拍電影《作家的謊言》上更有拗撬。
聲明追究損失
諸葛事後回應話從來冇逼藝人去做唔想做嘅嘢：「合作講求彼此誠信，如果誠信出現問題，好難合作！」
事隔超過兩個月，諸葛同星韜國際娛樂文化有限公司噚日喺微博貼出聲明，內容提到：「就近日莊端兒小姐透過不同媒體及召開記者招待會，所述有關諸葛紫岐及星韜國際娛樂文化有限公司（「當事人」）的誹謗性言論及惡意虛假行為，我們已委託資深大律師處理，於今天入稟高等法院，控訴莊端兒小姐，除了討回公道，並追究事件發展至今對當事人所帶來的傷害及損失。」
諸葛噚日封嘴，莊端兒就透過好友迪子表示冇回應，佢嘅舊愛張致恒就以短訊回覆：「我唔方便回應。」
撰文：馮仁昭