八方噚日同大家提過，5年前嘅噚日就係UGL宣佈收購DTZ嘅日子，而當時好落力狙擊梁振英嘅《星島日報》就以頭版報道梁「投資輸光」，而身兼星島新聞集團非執董嘅CY當年今日就高調反擊，佢趁住出席活動時用咗差唔多15分鐘，不點名鬧爆《星島》嘅報道嚴重失實，仲批評追訪佢嗰位女記者喺酒會中大聲問佢問題，令佢尷尬難堪，暗指《星島》單方面攻擊佢呢位建制派特首參選人，報道背後係有動機。
時為《星島》總編輯嘅蕭世和不甘示弱，反指CY指控含糊、講唔出報道邊度失實，而且記者大聲提問唔等如無禮貌喎。
話說回來，當時《星島》經常以「一鋪清袋」形容CY可能真係唔夠準確，事關大家都係隔咗幾年先得知，原來CY同UGL簽咗秘密協議，袋咗5,000萬元。大嗱嗱5,000萬，點算清袋呀？