內房高層玩音樂椅？較早前中海外（688）主席兼行政總裁郝建民忽然拜拜，由副主席肖肖頂上，噚日另一隻內房龍湖地產（960）又話，執行董事顏建國「因個人其他發展」而辭職，市場消息話佢係返去中海外。
點解話佢係「返去」中海外呢，皆因49歲嘅顏建國2014年先至加入龍湖，分管物業同運營部份，之前佢喺中海系母公司中國建築工程總公司任職多年，不排除中海外嗰邊急住搵人，即刻召舊將回巢。
消息人士指，以國企風格，顏建國未必可以「一步到位」直接空降中海外任最高層，或先委以其他職位。佢打趣話：「若位置不是比龍湖現職高，他幹麼做這種選擇？」