唉，家陣九十後大得咁快，最細嘅九十後都16歲咯。香港馬圈亦越來越多九十後騎師出現，就連23歲的嘉琦妹（本月10日滿24歲）話咁快就變嘉琦姐。
事關史卓豐、祈普敦、連達文、莫艾誠、巫顯東、黃皓楠，年紀都細過嘉琦，全部21、22歲，係94、95年生產嘅小鮮肉。其中來自愛爾蘭嘅莫艾誠最後生得21歲，原來佢18歲先第一次上陣，3年間就搖身一變，成為歐洲星級天才騎師，因此獲馬會睇中，請佢來港客串，呢塊鮮肉直情可以媲美A5級和牛，真係煮多幾年隨時雷神莫雷拉都要行埋一邊。
面對咁多精力充沛嘅小壯男挑戰，今季嘉琦姐嘅鋒芒大減，上月底更因晨課跌馬，嘉琦BB近腰部位置縫咗四針，雖然唔算嚴重，已可恢復比賽，但睇嚟嘉琦想成為最強九十後騎師，真係要加倍努力！