長實地產（1113）「樓神」趙國雄最近歌興大發，上次介紹荃灣新盤「海之戀」唱咗兩句譚詠麟《霧之戀》，噚日推馬鞍山新盤就「有請小鳳姐」。
話說長實有個馬鞍山新盤，名為「星漣海」（Seanorama），呢個名聽落算喺一般人接受範圍之內，至少同的士大佬講都冇咁尷尬，但揭曉過程就相當老餅。
趙國雄搵人播三首歌，叫現場地產代理同傳媒估樓盤嘅其中一個字，三首歌分別係徐小鳳《星星問》、黃霑《滄海一聲笑》同埋陳百強《漣漪》，全部係上世紀八十、九十年代嘅老歌，搞到現場地產代理都冇乜反應畀到，最後要由樓神講晒答案。
好期待樓神下次再點歌呀。