曼聯又和一場，周日英超作客「拖肥糖」愛華頓衰收尾，完場前換入「爆炸頭」費蘭尼諗住泊大巴守到尾，點知呢位前愛華頓中場送12碼畀前東家，紅魔慘被逼和1:1，聯賽連續三場和波失分。主帥摩連奴賽後被質疑佢換人有問題又發爛渣；費蘭尼就被網民笑到面黃，連名宿都話係佢「效力愛華頓」最好表現嘅一場波。
14戰21分 奪冠冷到45倍
伊巴謙莫域喺完半場前三分鐘，趁愛華頓門將史基倫保出迎快一步挑射入網，近五場波四場都有波入，狀態認真唔錯。不過曼聯喺呢場波其餘時間威脅唔大，踢到完場前五分鐘摩佬派出長人費蘭尼入替米希達利恩，諗住頂到尾。呢個時候曼聯官方twitter仲即刻出文賀爆炸頭第100次代表曼聯上陣，點知兩分鐘後就出事。喺禁區同伊祖沙古爾爭波被吹罰12碼，曼聯twitter亦隨即「報喜」。雖然慢鏡睇番古爾有插水之嫌，但極刑判咗邊有得收番，巴尼斯主射入網扳平1:1。
曼聯英超三連和，近八場聯賽只係贏得一場，踢咗14輪得21分。其實喺英超時代都試過兩次，其中92/93球季最後仲成功後上封王㖭，不過當時曼聯喺14輪只係落後榜首三分，而𠵱家就已經落後榜首車路士成13分，離前四亦有九分，難怪足智彩已經將紅魔奪標賠率冷到45倍。英國skyBET亦將曼聯今季四名完成球季賠率調整為3.25倍。
連尼加抽水踩埋一份
費蘭尼今場波上陣幾分鐘，一次成功攔截都冇，貢獻咗一犯規、一黃牌同埋一次12碼畀愛華頓，連名宿連尼加都喺twitter揶揄佢：「呢次係費蘭尼其中一場最佳比賽……為咗愛華頓。」其他網民都落井下石：「費蘭尼作為愛華頓嘅沉睡電池，今日又啟動嘞！」
摩佬喺賽後被問及點解要換入費蘭尼，佢即刻被撻着：「你（記者）咁問係咩意思呢？我覺得你應該比你𠵱家顯示出嚟嘅水準更加識波。愛華頓踢法簡單直接，呢個時候有需要一位球員去保護防線。」另外摩佬亦有回應近期熱傳嘅逃稅報道，強調佢多年嚟冇隱瞞任何嘢，身家清白。
