零售轉弱，唔少名店趕執笠，好似Coach、A&F都係提早退租中環旗艦店。而呢個名店執笠潮，又再添新成員，就係賣Polo恤出名嘅美國品牌Ralph Lauren，啱啱提前接近4年撤出銅鑼灣利園二期旗艦店。
業主希慎（014）決定將呢個2萬呎巨舖，分間出租，轉租畀餐飲租戶，唔再租畀名店，減低退租風險。
Ralph Lauren其實喺2014年頭，先至租用利園二期3層巨舖，個舖位處恩平道同邊寧頓街交界，加上有個特大養眼外牆，行過利園附近實見到，不過呢個舖上星期無聲無息結業了。
睇番租約，個舖租約本身到2020年到期，即係提早接近4年唔玩，應該要向業主希慎賠唔少錢。
希慎確認Ralph Lauren提早停止營運，但冇講對方賠幾多。由於餐飲業重要性逐漸增加，所以現址將會引入多家嶄新概念食肆，同時會興建行人天橋，連接利園第三同第五期。