鄧麗欣（Stephy）是女子排球隊Loey的隊長，近年積極推動排球運動，最近Loey排球隊展開校園友誼賽之旅，首站是Stephy的母校屯門佛教沈香林紀念中學。早前Stephy率領球隊Loey到母校打友誼賽，先跟現役女子校隊作賽，之後就是舊生隊，全校師生和不少舊生都專程返校觀戰，結果兩場賽事由Loey隊勝出。
見老師好開心
Stephy接受訪問時說：「今日比賽地方好特別，就係我嘅成長地、我嘅母校，其實好耐冇返嚟，有返嚟都唔係打波，今次同咗學校現役女子排球隊同舊生隊打比賽，老師都有落場打，有體育老師、數學老師，好多老師都仲喺度，就算退咗休嘅老師都返嚟睇我哋，好開心，好犀利佢哋，咁多年都係咁有活力，仲跳得打得，當中有啲老師仲係當年教我打排球㖭。」
辦獎金制盃賽
對於今次選母校做排球友誼賽的首站，Stephy說：「今次籌備咗個幾月，親自聯絡學校，搵番啲舊生、以前師兄師姐同老師，我都估唔到咁齊人。」並表示心願是舉辦獎金制的排球盃賽，期望2017年可以達成。
問Stephy會否想過找男球員加入Loey？她說：「我知道有啲地方有男女混合賽，喺台灣都有，真係一個正式比賽，同女排制度有少少唔同，我都想搞，因為香港未有，想引入個運動，等男仔、女仔一齊打，因為有時未必夠一隊女仔或一隊男仔去打，都幾有趣。」
採訪：馬建華
攝影：葉君海