深港通大話話都講咗兩年，終於噚日開車，港交所（388）行政總裁李小加就好似自己嫁女咁開心，仲「話當年」講番滬深港通係點樣誕生。
事緣2012年嘅今日（12月6日），小加同時任上海證券交易所主席桂敏杰喺深圳一間小茶館吹水，期間大家喺一張紙巾上面，粗略寫低將香港、上海、深圳幾個市場連結嘅構想。當時佢哋諗住少少哋，玩住10隻股份做先頭部隊，點知sell條橋畀領導時，「要搞，就要搞大佢！」時至今日就有滬港通、深港通。
小加仲搞笑咁話，「我已經唔記得張tissue放咗去邊，如果仲留住就好啦，一定好有紀念價值」。
晨咁早有近600個業界人士、150個記者睇開通儀式，深圳、香港兩地連線做live，夾準時間一齊敲鑼，但中間預鬆咗時間。上次可能冇乜經驗，啲領導又太興奮講得太耐，搞到上海交易所嗰邊要跑上台，差少少趕唔切一齊敲鑼開市。所以有唔少睇過滬港通開通嘅人都話，今次深港通儀式順暢好多。
滬港通開通時，兩地交易所互贈實物股票。今次深港交易所都係送牛。深交所送嘅係深圳代表「拓荒牛」、港交所就委託做過iBanker嘅本地藝術家潘靜怡，創作銅牛雕塑「動」。夾埋「雙牛」就梗係想雙牛齊奔，牛氣沖天啦，慘在噚日大市無面畀，恒指、滬深指數齊齊跌。