恒生銀行（011）唔少高層都係唱得之人，每年恒生請傳媒朋友去中環恒生總行食蛇宴，都見幾位「歌王」越食越high爭咪唱歌!
前晚蛇宴高潮，應該係私人銀行及信託服務主管陸庭龍（Alan）同企業及商業銀行業務總監林燕勝（Donald），兩大歌王深情對唱譚校長嘅《一生中最愛》。
兩位阿哥做同事十幾年，忽然來個深情剖白，話大家係對方嘅一生中最愛，所以特登揀呢隻歌唱出心聲，佢哋仲要唱得十分投入。
唱腔似足譚校長嘅Donald，一開聲唱「如果癡癡的等某日，終於可等到一生中最愛」已經使出震音，唱到戲肉「說一句想跟你一起」兩位仲嚟個愛的抱抱。真係肉麻到不行。
不過兩位都係搞氣氛箒，恒生一姐李慧敏見大家咁高興，亦開金口，同一班管理層唱《阿信的故事》主題曲，即係「命運是對手，永不低頭，從來沒抱怨半句，不去問理由」嗰首呢。
今年唔少投行、銀行請員工食無情雞，恒生差啲因為要同母行匯豐風雨同路，只差一點點就要凍薪。呢首歌可能係好多恒生人嘅心聲喎。