這天沙田泥、草日馬，以泥地賽為多數兼中下班賽做主打，當中頭兩場都係最低班泥地賽。結果雷神莫雷拉用咗短短半粒鐘，就將呢口五班泥地孖寶據為己有，佢頭場幫「彩球」打破轉投告達理齋缽後，第二場五班1800米泥地，再贏大摩馬房大熱門「合拍飛龍」，後駒單Win及組合獨贏A1分別派28.5及24元。
現年四歲的「合拍飛龍」獨沽一味識贏泥地，不過跑到第三季，今日之前都只係贏過一次咁大把。前仗11月2日跑泥地夜馬四班1800米，首次跑過終點時，「合拍飛龍」躍過跑道上的影子，因而失去平衡，最終跑平頭第四，上次由何澤堯跑日馬泥地五班一哩則獲第三。
呢次「合拍飛龍」雷神騎番，13檔起步孭133頂磅，索性靠放採取主動，就此貼欄由頭帶到尾，臨尾收韁下仍大勝4.5馬位而回，平了剛戰廄侶「海翡翠」的今季贏最遠紀錄。加埋頭場贏「彩球」，雷神這天頭兩場合共勝出六個幾馬位，不愧為神級騎師。大摩說：「『合拍飛龍』重戴眼罩，令牠的競賽情緒更為集中，可以輕鬆領放，發揮出應有水準；預計今場牠加十分左右，希望升上四班仍可交出好表現。」
今場二至四名順序為「非凡者」、「保證滿意」及「糖黐豆」，四重彩派二萬五千幾。