上周六西甲大戰，巴塞隆拿主場迎戰皇家馬德里。巴塞由蘇亞雷斯喺下半場先開紀錄，諗住全取三分破皇馬今季不敗之身，點知到補時「90分鐘先生」沙治奧拉莫斯又入波扳平，國家打吡1:1和局收場。兩大球王基斯坦奴朗拿度（C朗）同美斯賽前好老友咁有握下手，但成班主場巴塞球迷就唔多禮貌，針對C朗大合唱，串佢係同性戀者，球會隨時面臨被罰。
C朗逃稅 財政部徹查
仲記得沙治奧拉莫斯喺2014年歐聯決賽法定時間完場前入波扳平馬體會，之後加時大勝封王。到上周六又救皇馬一命，補時接應莫迪歷開出嘅罰球頂入扳平1:1，保住皇馬今季不敗之身，保持六分領先優勢。C朗今場波雖然冇波入冇助攻，但對住死對頭唔使輸，似乎亦冇被球迷辱罵影響，賽後心情大好，喺更衣室擺個chok到行嘅姿勢（紅圈），同隊友齊齊剝晒衫影大合照。不過據報西班牙財政部將會展開C朗涉嫌逃稅調查，有指佢加盟皇馬後賺到1.5億歐元（12.4億港元）廣告收入，只係畀咗當中4%稅。
