踏入12月，天氣涼涼哋，確係運動嘅好時間。噚日除咗新地（016）舉行ICC跑樓梯，大棠度假村亦有場「保良局慈善跑」。68歲嘅股評人藺常念參加3公里賽事，點知佢話跑到差啲要叫白車，認真大吉利是，好在佢冇事咋。
香港股票分析師協會有份贊助今次賽事，會長鄧聲興、永遠榮譽會長藺常念等一班股評人都有落場，短短哋跑3公里賽事。
鄧聲興用20分鐘跑完（冠軍約10分鐘完成），佢見到藺Sir比佢早到終點，但原來藺Sir跑咗2公里已經上氣唔接下氣，仲講笑話「差不多口吐白沫，要叫白車」，佢休息一陣回氣後就決定放棄，直接返終點等大家。
唔少參加者都話，是次比賽多斜路同樓梯，要上上落落好辛苦，藺Sir一把年紀，跑到2公里都叻喇，志在參與啫。