所謂天道酬勤，你睇葉楚航及蘇偉賢近日經歷就知。呢對本地練馬師上周五晚（2日）過大海捧老友馬主吳國敬場，結果阿敬當晚於澳門夜賽起孖同佢哋一齊拉頭馬。同晚葉、蘇漏夜坐船返港，兩人天未光便到沙田馬場督操，結果葉楚航今日第三場贏「又襟又準」後，第四場輪到蘇偉賢贏馬，攜手包辦第三口孖寶，而且大家都係贏1檔馬。
第四場四班1200米泥地短途，蘇偉賢馬房「勁優秀」配柏寶出擊，1檔出閘沿途守第五位貼欄慳位跑，直路借勢移出中叠，輕鬆追過放頭冷馬「勇冠多」贏個半馬位，「勁優秀」打開今季勝利之門，單Win及組合獨贏A1分別派47及25元正。
「勁優秀」出自柏寶手筆，呢位澳洲勇將累積連勝六個賽日未斷纜，蘇偉賢亦告連勝四次賽事，暫有24Win，稍稍擴大練馬師榜領先優勢，兩場head住方嘉柏。
反為炒飯哥羅理雅今場騎「勇冠多」出擊未竟全功做二奶，暫時未能夠於停賽十個賽日前贏馬補數，而今場「勁優秀」、「勇冠多」兩駒構成的37倍着啡燈Ｑ，令到落飛黨收取1,200萬巨款。今場三、四名分別為「頌友」及「銀城福星」，四重彩派五萬蚊多啲。