財爺曾俊華日前幾乎講到出口話預咗參選特首就會有抹黑，但佢都無懼抹黑積極考慮參選，而特首梁振英就唔回應曾俊華嘅言論。就喺5年前今日，CY亦出咗篇聲明呼籲停止抹黑，歷史果然係會重演。
八方之前同大家重溫過，5年前呢個時候，CY先後被指同紅顏知己鄧淑德關係密切、DTZ賣盤引伸至佢生意失敗、華懋官司中被法官質疑誠信問題。5年前嘅今日CY因應接踵而來嘅醜聞，發聲明就華懋官司解畫，表明「不要讓七百萬人失望，不要為香港選舉歷史留下污點，本人鄭重要求馬上制止類似的抹黑行為！」
真係有趣嘞，香港出現過3次有競爭嘅特首選舉中，其間都出現大量抹黑情況，而CY當日疾呼唔好抹黑，同曾俊華日前話抹黑係從政者生活一部份擺埋一齊睇，真係相映成趣。值得一提嘅仲有，當日澳洲UGL正式宣佈收購DTZ。