新地（016）大股東郭炳江獲准保釋後，除多陪家人，亦趁佢65歲大壽見晒一班老友。仔仔郭基煇噚日爆料話，爸爸早前慶生擺咗八圍，請晒所有老友記出嚟，好warm、好開心咁話。
郭基煇認為，爸爸過去兩年嘅困難中，就算「我哋覺得唔公平，係冤案又好」，佢都從無一句怨言。而所有朋友、同事係佢返嚟後，「一如以往，更加熱情歡迎佢返嚟，睇得出佢有好多真心朋友」。
咁兄弟呢？郭氏三兄弟多年前內訌，大哥郭炳湘自立門戶，日前有傳三兄弟為慶祝郭老太鄺肖卿87歲生日而聚首食飯。
一向孝順嘅郭炳江承認「媽咪生日，全家同佢慶祝」，但佢話大哥（郭炳湘）本身要嚟，但「因為有事去咗（其他）地方，所以冇嚟」，仲開玩笑叫大家咪再去四季酒店「捉佢」㖭！