上周六德甲RB萊比錫（白衫）喺主場迎戰史浩克04，繼續發揮黑馬本色。萊比錫射手迪姆華拿開波19秒就博到12碼，親自操刀射入先開紀錄。雖然客軍有哥拉辛拿斯喺31分鐘扳平，但佢喺47分鐘一次角球攻勢中擺烏龍，令萊比鍚以2:1贏波，八連勝力壓拜仁慕尼黑重返榜首。至於多蒙特喺同日就有馬高列奧斯送出三球助攻，令「蜜蜂兵團」喺主場以4:1大勝慕遜加柏。