堂堂冠軍級大摩馬房，今季其新勝馬無一連捷，遭人詬病，但跑到這天第八場泥地三班一哩，終於破數據，大摩訓練、田北俊名下的「人民武士」匆出由贏開的田草轉戰泥地，結果由同一騎師祈普敦在沙田馬場再贏一次，成為大摩今季首匹連捷馬，單Win及組合獨贏A1分別派58及21元正。
眾所周知，「人民武士」由自由黨榮譽主席田北俊擁有，這匹四歲馬上周日由祈普敦爆冷贏三班1400米，相隔短短一周，馬兒這天在同一騎師胯下初跑泥地賽。早段「人民武士」一直貼欄居中，留住跑一步冇蝕過，直路在內疊曾冇位，末段移出即以強勁加速力，趕過原本走甩咗的大熱門蔡約翰馬房「紅運精彩」（馬主夏佳理），出現田北俊與夏佳理一對前黨友名下馬大鬥法的過癮鏡頭。結果「人民武士」反勝「紅運精彩」個多馬位率先衝線，馬兒八日內兩捷，田北俊個人合共可袋約100萬獎金，可惜田北俊這兩次均無現身拉頭馬。
「紅運精彩」力保一席亞軍，但今季仍未打開勝門；三、四名分別為「盈豐駿駒」及「齊歡笑」，四重彩派三萬蚊鬆啲。