誠品書店係台灣大名牌，去台北唔行吓誠品點得，同學Y帶我地去到全台北最靚嘅街道──敦化南路嘅誠品敦南館，等左丁山行個飽，佢與左太就坐在裏頭嘅咖啡室休息吓，叫左丁山自己行。敦南道路寬敞，大樹青葱，眾多住宅大樓與高級商廈並存，住在呢度，實在方便到極。同學Y在台北生根40年，佢笑左丁山：「30年前你個個月來台灣出差，講咗好多次要在仁愛路或敦化南路買樓，但又下唔到決心。依家呀，睇怕你買唔起敦南公寓咯，望門興嘆啦！」可惜誠品咖啡室有咖啡，有紅酒，好似係冇酸梅汁啫。
誠品只有一層（二樓）係賣書嘅，其餘地方似係「生活廣場」，看來單係賣書就幾難支撐得起整盤生意，必須兼營副業，只希望副業唔好遲早變為主業啫。
行誠品最好就係hea，謀殺時間，打書釘，幫襯買書並非行誠品嘅主要目的。此日左丁山就見到不少「顧客」有老有嫩，坐在地上不同角落睇書，好似好專心，但行埋去一望，原來有不少人係用本書遮住部手機，收發短訊，反而啲年老客人就幾專心咁讀書。
行咗成兩個鐘頭，買咗半打書，左太又買咗五六部幼童書，已經有啲攰，去邊度好呢？左太話是日係美國感恩節，不如就去食火雞。同學Y一時之間諗唔出有邊間西餐廳會有火雞食，不如去仁愛路「香格里拉遠東國際」吃自助餐，或者有火雞供應都唔定。當時已係六點幾，街上塞車到極，又落緊雨，幸好馬路旁就有一架的士經過，立即截停上車，而司機又唔好似香港司機咁乘機詐型拒載，於是塞塞吓就去到香格里拉。呢間酒店嘅咖啡室，專營自助餐，台北呢間，每位只收費港幣270元（以匯率3.9計），平過香港好多，在金鐘或尖東香格里拉Cafe Too吃晚上自助餐，記得係要五百幾蚊嘅，而且唔容易有位㖭。呢處嘅自助餐又幾好水準，維持到香格里拉水平（即並非最好，但過得去以上）。此晚又真係有一隻大火雞噃，台北食客唔領情，左丁山就第一個走埋去攞，之後又有外國遊客要食。火雞幾好味，於是叫杯餐酒飲吓，侍應話要額外收費。幾多呀？99元新台幣喎，聽完幾乎不敢相信，頓起移民台北之念，同學Y大笑：「你在香港賺港幣，在台北使錢就高興啫，移民台灣，在台灣打工賺錢，你就未必想嚟香格里拉食餐咯！台灣人工好平嘅咋，年青人移民台灣，搵食幾艱難。」咁又係，香港人揸住個錢到台灣樣樣睇得順眼，與台灣嘅新畢業生係有思想差距嘅。