全靠金崎夢生梅開二度，鹿島鹿角（圖）喺噚晚嘅日聯季決賽次回合，反勝浦和紅鑽2:1，兩回合踢成2:2，鹿角憑作客入球優惠封王。
紅鑽首回合靠阿部勇樹射入12碼，作客贏鹿角1:0。佢哋上周六晚返到主場踢次回合，一開波就喺右路搶攻。五分鐘，高木俊幸接應傳中近射，省到鹿角球員出底線。兩分鐘後，高木俊幸右路落底傳中，鹿角掛住睇近柱，遠柱嘅興梠慎三喺無人看管下斜身射入，為紅鑽領先1:0。
金崎夢生梅開二度
10分鐘，紅鑽嘅武藤雄樹又喺右邊發難，爆過昌子源，窄位勁射可惜中楣彈出。之後鹿角企穩陣腳，搶番唔少攻勢，仲喺40分鐘追平。遠藤康喺右邊斬靚波，金崎夢生飛身一頂，幫鹿角半場追成1:1。換邊後紅鑽越踢越差，槙野智章仲喺79分鐘輸12碼。金崎夢生主射破網，幫鹿角喺劣勢下反勝2:1；兩回合2:2，鹿角靠較多作客入球捧盃。鹿角周四就會以應屆日聯盟主嘅身份出戰世冠盃，同大洋洲代表奧克蘭交手。