今年4月民政事務局常任秘書長馮程淑儀捲入換樓醜聞，被揭發以低於市價，同賭王何鴻燊三太胞妹陳婉玉樓換樓。事件曝光後，佢老公馮永業同陳婉玉更加被爆出疑似有婚外情，搞到馮太同老公盛傳婚變。事件揭發後，久未露面嘅馮太噚日出席政府回歸20周年活動記者會，睇落容光煥發，但左手就仍然未戴番隻婚戒喎！
自從馮永業4月喺facebook承認瞞住太太同陳婉玉「交往」，馮太嬲到帶埋個女搬離跑馬地寓所，當時馮太已經除咗婚戒。雖然大家都以為佢哋家變，但馮太一直冇話要離婚，到今時今日喺政府網站資料仲繼續冠夫姓，加上上個月又有傳媒影到馮太同老公前後腳出現喺半山一個屋苑，疑似復合喎。不過，馮太出席記招時，對玉手上仲係乜都冇，唔見對老公開出綠燈，令佢婚變傳聞繼續疑幻疑真。