在君品酒店吃早餐，有中英日文報紙供食客選擇，左丁山一手拿走四張（其實成間餐廳幾乎坐滿人，只得左丁山一人攞報紙睇），即蘋果、聯合、中時，與自由時報。兩份前國民黨大報（創辦人余紀忠與王惕吾皆國民黨中常委）薄薄哋，似香港蘋果日報，點解呢？台灣無「政治性抽廣告逼害」嘅啫，呢兩份30年前嘅權威大報似乎廣告版數稍遜，同昔年「印銀紙」嘅盛況，不可同日而語咯。「自由時報」聽講係「綠色」，有綠營支持，廣告多得緊要，有啲睇頭，「蘋果日報」都唔曳，啲地產廣告全是彩色全版，多到睇唔晒，比「自由時報」似乎更多少少。記得接車司機話台灣報紙近年總體銷路下降，全受電話上網衝擊，與世界大勢相同，但台灣蘋果訂購不打折，不免費贈閱與對手競爭（有報紙向新開店舖贈閱三個月，列入每日銷路之內）仍不輸蝕，仍係台灣嘅報紙銷路冠軍。
君品之早餐，ok咁啦，難與曼谷一級酒店相比。侍應服務就總係差少少，想成為國際級五星酒店，還須努力。餐後到樓下「時尚廣場」一行，地下至五樓人流稀疏，地庫直通轉運站與地鐵，超市亦設於此，就人流多一啲，但總體嚟講，與東京大阪嘅火車站商場比較，人氣差好遠啫，點解惡佬明話3年前到此，有車水馬龍之感，水洩不通呢？後來醒起，可能係當年大陸遊客蜂擁而至啩，依家蔡英文上台，北京又使出「斷人流」一招，陸客大量減少，於是此商場生意大不如前了。以前係咁樣，現在亦如是嘅，就係台灣百貨公司與商場愛出租攤位櫃台，以增加收入，於是行人通道傍也亦盡量擺滿不同類型售貨架，令整個商場全無主題，給人一個街邊雜貨攤感覺，成個場雜亂無章。
行過一輪之後，左太之寶血幼稚園同學來電，已訂好位，中午到距離佢住所不遠之南京東路4段61號「點水樓」吃小籠包，於是坐的士前往（車費又係平香港好多），一落車，移居台灣40年之同學Y已在門口等候，呢間「點水樓」有乜咁巴閉，到台北吃小籠包點解唔去「鼎泰豐」？同學Y話鼎泰豐門口排隊煩死人，過去大家都食過n次咯，不如嚟呢間宣傳為「全台灣人氣小籠包評比大PK」之第一名「點水樓」啦（第二名係鼎泰豐）。
咁巴閉，打醒精神叫兩款小籠包，一款牛肉麵，醉雞再加宋嫂魚羹食吓先！唉吔，一吃就不是那回事了。