立法會噚日舉行年度火警演習，70名立法會議員入面只有13名參與，民主派佔7人，比建制派多1人，當中包括慢必陳志全、鄭松泰、毛孟靜、民主黨鄺俊宇、涂謹申同尹兆堅、葉建源，建制派就有立法會主席梁君彥、民建聯元秋蔣麗芸、黃定光、何俊賢同柯創盛、新民黨田北辰。
負責總結嘅港灣道消防局高級消防隊長話，火警演習有特別嘉賓，就係噚日咁啱去立會參觀嘅學生，話學生喺立法會保安指示下第一批到達集合位置。噚日有433人參與走火警，消防隊長讚佢哋好快速、好卓越完成集合，全程只用咗10分05秒，比舊年快25秒，仲叫參加者畀啲掌聲自己。
走火警期間不乏搞笑場面，好似元秋喺火警鐘響前，已經同在場記者講：「我殿後！唔想你哋燒死啊！」又讚黨友象哥黃定光走得最快，象哥講笑話自己唔係行落去而係跳落去，之後就自爆其實喺未響鐘嗰時已經落定去。
田二少「拒救」葉劉
元秋之後又搞gag，話集合現場只有9個議員，仲有61個未出到嚟㗎，假如要補選，咪好大鑊？又問近日被指同黨友葉劉淑儀鬧不和嘅田二少點解唔見葉劉，叫二少快啲上去大樓救葉劉，話唔定可以破冰呢？田二少聞言只能尷尬苦笑：「咩破冰之旅呀？」
白鴿黨鄺神鄺俊宇就話，上次走火警已經係小學嘅事，由於噚日勁曬，所以下次會考慮學吓同事帶把遮。尹兆堅就自爆同鄺神趕喺火警鐘響前搭𨋢落嚟，搞笑話見到集合地方唔多議員，自己都唔算好遲，「咁唔使DQ啦！」
雖然唔少議員都偷雞搭𨋢，但立法會亦不乏堅行樓梯走火警之人，包括慢必同鄭松泰，慢必話今次係任內第一次行立法會樓梯落地下，發現日後投票如果趕時間，其實行樓梯仲快，只需3分鐘左右。
李八方
mailto:[email protected]