出年就係香港回歸20周年，政府為咗大事慶祝，早咗成半年開記者會公佈一連串慶回歸活動。多次公開講無意競逐特首寶座嘅政務司司長林鄭月娥，仲係20周年慶回歸活動嘅跨部門督導委員會主席，全權負責搞回歸活動。
下年同候任特首匯報
林鄭噚日就話回歸20周年係大日子，慶祝活動梗係要搞大佢啦，規模同10周年、15周年一定會好唔一樣。20周年慶回歸主題係「同心創前路 掌握新機遇」，明年4月會有官方慶典主題曲、宣傳短片出爐。政府為咗搞回歸活動，仲特登設立咗一個20周年慶典基金，呼籲全城人出錢出力參與。咁到底國家領導人喺咁重要嘅日子會唔會嚟香港「多走一走、看一看」，林鄭話暫時未有消息公佈喎。
明年3月係特首選舉，大台記者就問林鄭政府換屆之後，佢會用咩身份出席7.1活動？林鄭冇直接答，只係話會同一班同事做好回歸20年工作，又話出年4月大家就會知道有一位候任特首，到時會同候任特首匯報工作，咁即係真係唔選特首？