鄉議局聽日將會喺元朗東頭工業區遊樂場，舉行捍衞原居民合法傳統權益聲討大會，有鄉議局消息透露，鄉議局本來諗住搵萬幾二萬名新界人出席聲討大會，但唔少鄉頭近日受到西環新界工作部方面施壓，叫佢哋當日唔好動員咁多村民出嚟，話怕影響該處秩序之餘，亦怕民主派有人「滲入煽動」云云，話最多只能有幾千人出席。有新界鄉頭坦言，對西環連捍衞傳統利益都要打壓感到反感，聲言日後唔會出席中聯辦活動喎。
該鄉議局消息又透露，早前公開宣佈有意參選特首嘅退休法官胡國興（圖）聽日都會到場，話覺得胡官既然要爭取入閘，當然要畀面冧掂新界人喎！
八方噚日問過胡官辦公室，佢哋確認胡官會出席呢個大會，話因為鄉議局方面邀請，所以答應出席喎。