八方同大家回顧咗好幾日梁振英俾法官質疑冇誠信嘅歷史，今日轉一轉話題。5年前今日梁振英、唐唐以及當時仲考慮緊參唔參選嘅新民黨葉劉淑儀出席公務員論壇，呢個論壇明顯係葉劉主場啦，唐唐就因為開口夾着脷而失分，梁振英又點呢？
實情當時佢嘅表現都算中規中矩。梁振英開口埋口都以「舊同事」稱呼現場嘅公務員，起碼拉近咗雙方距離，然後又應承會全面檢討公務員工作量同人手配置問題，仲話會要求自己嘅問責團隊喺公務員受政治壓力時公開撐等等。
梁振英講嘢不嬲都好好聽，不過實際上呢幾年嚟多得佢撕裂社會，市民對政府不信任增加，前線公務員首當其衝，工作量不減反增，至於梁振英嘅問責團隊就直頭係出色啦，不時自製政治炸彈畀公務員拆，充份咁考驗公務員嘅危機處理能力。唔知𠵱家啲公務員仲想唔想梁振英連任呢？