無冤不成夫妻，無仇係咪做不成契兄妹？話說舊一幫嘅西環契女契仔，即係梁美芬同謝偉俊，噚日喺立法會討論應否畀5名立法會人員就長毛接受捐款後冇申報一案作證時，喺會議廳內互轟，唔少人在場睇戲食花生！
憂發言影響審訊
話說梁美芬狂鬧反對人員就案件作證嘅民主派誤導市民近10分鐘後，連謝偉俊都頂唔順，即場提出規程問題，批評梁美芬發言內容講到長毛好似知道接受捐款後嘅相關責任，擔心對方若再咁講，會影響未來法庭審訊，公開呼籲梁美芬：「我希望佢唔使呢方面講太多！」簡單而言，即係叫佢收聲！
主席梁君彥聽到謝偉俊提點，幫理不幫親，即刻要求同屬經民聯嘅梁美芬返番嚟講正題，梁美芬聽到即刻嬲嬲豬話：「唔係返番嚟！我一直都講到題！」反叫謝偉俊細心聽佢表達，唔使咁憂慮，話法庭自會有標準去審案喎。
謝偉俊聽到梁美芬咁講，即時再次企起身挑機，話梁美芬講緊嘅係審訊期間一個主觀因素，總之即係都係唔講好過講；梁美芬見謝偉俊兩次插自己發言不當，就話自己一直集中講議員喺議事廳嘅權力，「希望謝偉俊唔好成日劖亂歌柄，淨係佢自己講嘅先至啱。我本來已經講完，不過有人想show off要講」，之後嬲爆結束發言，為呢場花生騷謝幕！
李八方
mailto:[email protected]