啱啱同新西蘭班霸奧克蘭城友賽嘅理文流浪，今晚八點喺青衣運動場嘅港超迎戰富力。流浪友賽奧克蘭城輸咗1:4，最慘係傷幾件，傷兵有黎耀昌、羅俊仁、陳銘剛、張健峰、葉頌朗、佐迪、許嘉樂同埋長唞嘅連卓思，成大半隊正選，主教練馮凱文唔頭痕就有鬼，好彩即時搵咗件巴西鋒將丹尼斯頂檔，馮教頭就希望今晚攞到三分沖喜吓。門票收80蚊同30蚊（長者及學生票）。