高峯時期曾月入百萬，更有機會接拍內地中央電視台的劇集，但陳建穎（Ray）仍選擇離開娛樂圈，寧願由低做起轉職保險從業員。很好奇他離開原因？他說：「我覺得唔可以淨係搵錢，我有少少搵唔到自己。」Ray去年底已成家立室，現在每日忙於湊六個月大寶貝女Avery，樂於平淡。
現年43歲的陳建穎（現名陳紀匡），95年憑着與陳慧琳、陳曉東及邱穎欣合唱的歌曲《打開天空》而為人認識。當年甚有人氣的他，曾經試過一日出席五個活動，每個活動的酬金均有五位數字，日前他接受本報專訪時說：「都有試過七位數（一個月），𠵱家就平均啲，以前可能係一個月好好，跟住之後嗰三個月就普普通通，但𠵱家就係平均嘅。」Ray坦言當歌手時，未曾試過為生活費而憂心，他笑言是因自己總會找到賺錢的方法，他說：「仲做緊歌手嗰陣，我試過傾咗個韓國健康食品嘅代理番嚟，仲喺韓國開咗公司，請埋當地人去賣，之後因為成本太高冇繼續做，不過都冇蝕錢。」
難頂閒言閒語
Ray選擇離開娛樂圈的原因跟金錢無關，他說：「我覺得娛樂圈好多嘢要等，同埋太過不受自己控制，唔係淨係搵錢，我有少少搵唔到自己。例如當年我好瘦，嗰陣當我操弗啲，就會有人話你肥咗好多，但到我再瘦番，又會有人問你係咪吸毒，我覺得好難去處理人哋嘅期望，同埋我唔俾人話得。」他表示自己加入娛樂圈時年紀尚輕，很多事情不懂處理：「嗰陣個人冇乜歷練，我多倫多畢業之後，唱歌就係我第一份工，所以演戲嗰啲，好多都係一個表情，真係唔適合。」
07年於內地拍畢中央電視台劇集《香港姐妹》後，Ray便退出娛樂圈，其後經親戚介紹下，轉行加入保險業，努力了七年，現已成為有三十多名下屬的高級分行經理，但最初仍會遇上困難，他說：「難嘅，我上司都擔心我未必轉到行，頭一張單都係圈內人幫我買……好彩之前嘅少少虛名，其實有幫助嘅，好多人見到我，可能個老闆都未必即刻認得我，但佢個秘書就認得，咁變咗對我嚟講有好多方便。」
明年搞演唱會
Ray去年與圈外女友ViVi拉埋天窗，太太今年誕下女兒Avery，現在他每日忙於照顧六個月大寶貝女。問到假若再給他一次機會，會否依舊選擇加入娛樂圈，還是會選擇現時生活？他說：「都會入演藝界，因為你行完呢條路，個影響力會大啲。其實我做歌手嘅夢想，除咗喺紅館舉行個人演唱會之外，就係搞一個慈善演唱會，其實𠵱家都有人同我傾緊，最快應該出年成事。」是否想復出？他笑說：「復出唔敢講，冇能力，我唱得唔夠好，唔夠好嘅意思係唔夠特別，但聲靚都做到嘅。」問到會否贊成囡囡將來加入娛樂圈？他說：「唔介意，個女鍾意就得，其實佢都有天份㗎，影相會望鏡頭，加上太太彈琴都好叻。」
採訪：譚倩宜、嵐山
攝影：卓振輝、馮峰、陳順禎
埸地提供：銅鑼灣HMV