騎師莫雷拉向來都備受馬迷擁戴，座騎十居其九都被捧成熱門。咁又難怪嘅，事關雷神莫雷拉剛啱至刷新香港賽日單一騎師最長連勝紀錄，新紀錄為連贏20次賽事。周日（4日）沙田日賽，雷神勢將有關紀錄再改寫。
翻查數據，今季莫雷拉策騎蔡約翰旗下馬的出賽上名率高達四成多，可想而知被稱為蔡神仙的蔡約翰當然會助雷神一臂之力。今期沙田賽事，蔡約翰將三匹實力馬交俾雷神發揮，包括第三場草地四班1200米「運財童子」、第七場草地四班1400米「主力艦」及第八場泥地三班1650米「紅運精彩」。
其中三歲澳洲馬「運財童子」上仗全程三叠望空，依然可以跑第三，質素一定有番咁上下。隔兩星期再出，繼續用雷神，其間快跳過兩課保持狀態，今次抽到較上仗為佳的8檔，可望借勢補中打開勝門。