特首選委會選舉11日舉行，估唔到連《城寨英雄》拳佬都有參選，但唔係選演藝界，而係IT界，點解離奇轉咗界別？
睇真啲，呢套宣傳片，查實係二次創作《城寨英雄》片段，驟眼睇落真係以為係藝人陳展鵬，原來片中人係荔園創辦人邱德根之子邱達根（Duncan），佢着晒唐裝打拳，之後仲有「Duncan」同「鵬鵬」對談，大講參選IT界選委嘅理念，有幾個鏡頭真係幾可亂真。花過心思果然寧舍不同，吸引唔少眼球成功宣傳。
Duncan一直都俾人話似陳展鵬，難怪諗到呢條橋。佢喺facebook解釋點解要扮陳展鵬：「俾人講咗咁耐，不如幽自己一默！拍呢段片都可算真係身體力行，NG咗N次出拳都出到手軟。」