雖然冇正式宣佈參加特首選戰,但新民黨葉劉淑儀去馬意欲好強烈,唔理入唔入到閘,佢都繼續同各界交流,學術界係佢重視嘅界別,佢仲成日「勾結」外國勢力㖭。噚日美國賓夕凡尼亞大學法學院嘅William Burke-White教授親臨立法會大樓同葉劉見面,原來賓大最近開咗新嘅研究機構Perry World House,主力研究國際關係,例如中、美互動,可能見葉劉浸過鹹水、做過官又係議員,所以教授邀請佢去賓大演講,同學生交流對國際政治議題嘅睇法。