收視雖然未達標，但ViuTV經常爭取到唔同類型節目嘅播映權，好似今晚舉行嘅韓國年度樂壇盛事《MAMA亞洲音樂大獎》，仲有廣告界盛事《2016金帆廣告大獎頒獎典禮》。
藝人版權問題
《金帆》頒獎禮原定本月18日喺《美選D.n.A》總決賽後晚上10點半播出，對撼無綫《萬千星輝頒獎典禮》後段時間，但無綫日前突然向《金帆》主辦商施壓，話當晚有份出席嘅旗下藝人唔可以亮相其他電視台，即使轉播都唔得，搞到ViuTV要抽起整個節目。
ViuTV發言人王小姐以短訊回覆時話：「日前突然收到主辦單位香港廣告商會通知，由於其頒獎禮內出席的TVB藝人未能於ViuTV亮相，故ViuTV未能轉播《金帆》。在這情況下，我們惟有決定抽起整個節目，我們會同廣告客戶直接說出因TVB藝人版權問題。」
《金帆》頒獎禮上月25日已經喺會展舉行，由岑杏賢同郭田葰擔任司儀，楊明、黎諾懿、應屆香港小姐同香港先生等擔任嘉賓，當晚ViuTV攝製隊已到場進行錄影，連場刊都有ViuTV《金帆》播映日期和時間，對ViuTV嚟講梗係有損失。
撰文：馮仁昭