左丁山上一次去台北，已經係2008年初，當時馬英九還在競選總統寶座。嗰陣時台北周圍靜英英，星期六早晨漫步街頭，在南京東路行街，十呎之內，不聞人聲。
眨吓眼，馬英九已經做齊兩任共8年總統，政績難言亮麗，離任後國民黨更受執政的民進黨政府迫害，下令將國民黨黨產國有化，中華民國國父創立之政黨，竟行將成為「無產黨」，可云悲乎，馬哥哥將來點有面去見舊波士蔣經國呀。
近年好多朋友去台灣旅行，去台北渡周末，左丁山似乎變成大鄉里，上星期三得兩三日空檔，就刻意不去曼谷，走咗去台北行一轉。國泰航機好準時，好快到達桃園機場，好似係七十幾分鐘箒，過關攞行李又係特快，整個入境大堂空空洞洞，只有我地嗰班機嘅乘客，與當日香港赤鱲角機場人頭洶湧嘅情況，相差好遠。於是下午四時起飛，未到六點已坐上接機汽車，直奔台北。唉吔，機場就人少，快速公路上就車多，北上南下嘅汽車似在告士打道排隊入紅隧，多過在路上飛馳，司機話：「台灣多咗好多汽車，每日上下班時間都係咁塞嘅嘞」，於是行吓停吓，睇吓iPhone計時，七十分鐘過後先至行到目的地，承德路君品酒店。
點解要住君品呢？係惡佬明介紹嘅，佢話三年前住過，酒店喺「京站時尚廣場」及台北地下街兼台北轉運站，好方便咁講。入到房，房間真係幾大，設備尚算滿意，只是成間酒店為咗營造氣氛，燈光光線不足，黑黑地、暗暗地，連睇房間號碼都要伸個頭埋房門口先至睇得清楚，對上年紀及視力欠佳人士，好唔方便。
台灣或者時興早睡，中菜廳於九點後已是last order，於是左丁山夫婦check-in後，擒擒青走上酒店十七樓吃飯，主要係吃老友曾智華大力推薦嘅「先知鴨」：君品酒店聲稱先知鴨係「北京填鴨」種，每隻喺出世後28天，由宜蘭養鴨場直送酒店，「先知鴨」如北京填鴨做法，燒得恰到好處，皮脆肉鮮，確係佳品；叫做「先知鴨」，係出自蘇東坡：春江水暖鴨先知。去肉後之鴨架就用以煲粥，足足一大窩，唔係誇張，煲粥大到夠十個人食，其餘菜式呢，叫做夠水準啦，無甚驚喜，但價錢（以港紙近3.9算計）就好正，香港酒店餐廳一定收雙倍以上。埋單之後就明白，點解咁多香港人到台灣食靚嘢，因為實在便宜吖嘛！