成功需父幹，做球員都一樣；周三西盃第四圈次回合，皇馬教練施丹個大仔安素，終於第一次幫一隊上陣，入咗一球下幫球隊6:1大勝利安尼沙晉級。
皇馬月中要踢世冠盃，所以較早時間已經踢咗首回合，皇馬以7:1遙遙領先，周三返主場更加大把條件輪換，收起晒基斯坦奴朗拿度同莫迪歷等主力，準備周六場國家打吡。皇馬都好有心，着住印咗「我哋都係查比高恩斯人」嘅波衫比賽，賽前亦有默哀，好心有好報，開賽只不過23秒，馬里安奴已經近門建功先開紀錄，刷新皇馬西盃最快入波紀錄。
巴塞僅和丙組仔
皇馬半場領先3:1，下半場安素就入替艾斯高，兩父子都踢過「艦隊」喇，63分鐘佢接應馬里安奴橫傳，禁區頂一射入網，幫皇馬領先到4:1，「地標」戰就入波更值得紀念。皇馬最終靠馬里安奴連中三元，以6:1大勝，兩回合計贏13:2晉級，為周六作客巴塞嘅國家打吡打下強心針。
施丹賽後對安素嘅表現有啲迴避：「安素入波我梗開心，呢場波大家都踢得好好，馬里安奴同馬田奧迪加特都唔錯。」對於國家打吡，施丹就話呢場唔係決定性嘅比賽，亦預期皇馬作客魯營一定難踢。
皇馬輕鬆晉級，相反佢哋國家打吡嘅對手巴塞就只喺第四圈首回合，由18歲小將艾利拿建功，作客1:1逼和西丙嘅靴高斯，不過「MSN」嘅美斯、蘇亞雷斯同尼馬就齊齊休息，次回合再砌過囉。