5年前參選特首嘅梁振英，當年呢段日子受華懋官司問題困擾，雖然佢曾經公開回應過，但仍然有唔少問題未解清，包括佢有冇濫用公職身份繞過正常程序向前規劃環境地政司梁寶榮施壓，令華懋如心廣場唔使補地價。
689當年今日終於露底，雖然佢強調冇繞過正常程序，但被問到點解要私下同梁寶榮接觸就封口，即使被問到當時以測量師身份見梁寶榮恰唔恰當，向來有得駁就一定駁嘅佢亦拒評。
另一方面，5年前呢個時候發生花園街大火，梁振英去咗災場視察，亦去咗時任社協主任何喜華搞嘅論壇，大談成日探劏房戶，乘勢硬銷房屋政策。當年大家都覺得CY關心基層、對房屋問題有獨到見解，但邊個諗到佢咁關心劏房，卻搵咗個出租劏房嘅陳茂波做發展局局長？