國泰空中服務員工會同資方展開年終談判，今年主打爭取延長退休年齡，由現時55歲延至65歲，工會特別製作咗一套約3分半鐘嘅短片《那一天我們不能再飛》，除咗邀請早排離職嘅港龍空勤人員協會前主席莫海珊（Priscilla）現身說法，仲搵埋職工盟統籌幹事王宇來粉墨登場。
Priscilla喺短片透露，當日辭職前考慮過退休年齡問題，因相信到55歲先重新搵工會非常困難，形容辭職係無奈決定。工會副主席畢珮瑩（Silvia）就話，拍攝短片除咗想爭取年輕同事支持，亦希望喚起公眾關注年齡歧視。工會早前已去信政制及內地事務局局長譚志源，爭取政府盡快就年齡歧視立法，佢慨嘆國泰多年來就工會提出嘅訴求採取拖字訣，已經預備長期抗爭撐到底。