八方呢幾日同大家分享過，5年前梁振英捲入涉及誠信問題嘅華懋官司醜聞，喺5年前今日，佢終於公開回應。
CY當時出席公開活動後話，「我哋唔能夠話所有喺民事案件裏面作證嘅，包括一啲專業人士，如案件輸咗，呢啲專業人士誠信有問題，法官亦冇咁講」。的確，當年法官喺判詞冇直接斥CY誠信有問題，但判詞話CY提交畀法庭嘅信件顯示，佢先後以諒解（understanding）、協議（agreement）、印象（impression）形容政府同意華懋可以延長物業發展期，而且佢接受盤問時解釋模糊，無法令人信納（not convincing）。
CY當日強調花咗好多時間回應唔同指控，「唔希望自己成為被搞黑材料嘅對象」。放番喺今日，早幾日先至因為被篤而唔敢同前港督彭定康同場現身論壇嘅曾鈺成，係咪別有一番感受呢？