香港寬頻（1310）喺深交所網頁嘅「深港通」下港股通名單中，「被改名」做「香港寬帶」，真係嚇到人個心離一離，相信香港寬頻啲公關呀，楊主光，應該更係嚇到個心離多幾離。
本報就問過香港寬頻發言人，佢哋話單嘢唔關佢哋事，自己都唔知情。好啦好啦，終於深交所最新更新份港股通名單（ http://bit.ly/2gTLvi8 ），香港寬頻，終於被正名返做「香港寬頻」啦！香港，唔使再寬衣解帶啦！
至於「香港寬頻」無啦啦變咗「香港寬帶」，真正成因冇公佈。不過如果閣下試下用Microsoft Word輸入「香港寬頻」，再用佢個「中文繁簡轉換」功能，你就見到「香港寬頻」，會變咗「香港寬帶」。
深交所喺深港通開通前，就製造個災難級誤會畀香港寬頻！咁點啫？問題冇錯唔係香港寬頻引發，但係都要解決架。香港寬頻前晚就Upload咗條片上Facebook，成條片24秒，講咗大約30次「香港寬頻」或「HKBN」或「Hong Kong Boardband」，聽講呀CEO楊主光有誠意到，自己都錄咗兩段聲！
片段入面仲講到「行不更名，坐不改姓」、「以香港為家」，埋尾補多句「香港寬頻始終都係香港寬頻」。今次搞到一鑊粥，真係可算係深港通下第一個受害者。