小弟同唔少新聞行家一樣，作息時間同一般白領好唔同，八、九點係普遍香港人睇電視黃金時間，相反小弟睇得最多電視嘅時間，係凌晨12點幾打後，睇完《創世紀》再睇埋《皆大歡喜》先肯瞓，朝早瞓到十點幾先起身。近期扭開電視，睇到大台重播台灣發水女神做嗰套《神鵰俠侶》，睇完難怪當地傳媒取笑女神呢套戲係小龍包，唔係小龍女。講開金庸，每套小說男主角往往經過一大輪奇遇後成為武林高手，楊過就識玉女心經、蛤蟆功、彈指神通等等絕頂武功，不過學得多自然雜，好似楊過最後期都係集中用黯然銷魂掌。
摩連奴馳騁歐洲球壇多年，當然都有好多招傍身，唔係邊得嚟咁多冠軍，以往車路士就靠泊大巴搞死唔少強隊。對付球員摩連奴就攻心為上，唔少猛將都收服得貼貼服服，好似摩連奴教皇馬，卡維奴講過游過英倫海峽都要加盟，伊巴謙莫域更加視佢做老竇。不過摩連奴大大話話都教咗曼聯幾個月，但點解好似冇咩傳出紅魔鬼邊位球員被摩連奴感動，反而係寸王如何如何棄用朗尼、舒韋恩史迪加、米希達利恩等等。
叫得寸王，摩連奴另一絕招就係打嘴炮。以前就有球評家講過，摩連奴刻意搵對手領隊打嘴炮，係想幫本身球員減壓，不過今時今日，好似係摩連奴向曼聯球員施壓多啲。
連踢水樽都出埋（圖），摩連奴都好似冇咩招數，除咗門將迪基亞，曼聯10個位都俾佢換過晒，但變極都係咁上下，唔通一月又要拎多一、兩億鎊買人先有新招？
文：牽牛