深港通終於下星期一起動，原它當日上市嘅大眾公用（1635），就麻煩借個歪喇。
上次盛傳深港通11月21號起動，全因21號掛牌嘅桐成（1611）話收到通知，當日唔接受租場敲鑼，點知食詐糊。今次深港通鐵定下周一（12月5日）開動，原訂5號掛牌嘅大眾公用，收到交易所通知，上市儀式要延遲到6號先敲鑼，但交易就如常5號開始。
大眾公用咁合作，唔知6號補敲鑼嗰陣，港交所（388）行政總裁李小加會否現身以示鼓勵呢？
此外，噚日交易所發通知，要求出席深港通開通儀式嘅傳媒全部要事先登記，9點通車，8點20分前要到，遲到唔准入，但就神神秘秘冇寫邊位主禮，唔通有勁重要嘅神秘嘉賓？
順帶一提，上次滬港通開通儀式撞正佔領行動，當時交易所唔准記者帶黃傘入內，今次深港通嘅邀請函就冇咁講，唔知到時會唔會又有突發安排呢？