前幾日小弟同牽牛兄傾開曼聯嘅近況，佢話領隊摩連奴江郎才盡，發晒老脾都贏唔到韋斯咸，但我覺得摩佬仲有招可以用，係睇佢幾時可以放低面子，用番舒韋恩史迪加（小豬、圖）啦。
雖然曼聯今季成績浮浮沉沉，中場踢得好亂，但只要有一個人喺度，隊波就會變得井井有條，嗰位仁兄就係卡域克。未計噚晚場英聯盃，今季卡域克有份上陣嘅比賽，曼聯都未輸過。不過卡域克已經35歲，場場踢就一定唔掂，所以有時摩佬都會搵安達靴里拉頂佢個位，但靴里拉踢慣八號位，今季初踢六號位，只可以話佢勤力有餘，但冇卡域克嗰種老成精嘅通透，始終卡域克係有嗰隻用一腳長傳就可以令戰局豁然開朗嘅能力。
其實，小豬就係最適合輪換卡域克嘅人，首先喺年齡方面，小豬32歲，喺防中呢個位嚟講仲正值盛年，加上小豬初出道踢翼鋒，其後轉踢八號位再轉六號位都掂，喺兩年前，佢就踢六號位幫德國拎世盃冠軍。喺態度方面，小豬更加無可挑剔，雖然佢俾摩連奴嫌棄，但從冇鬧過怨過，訓練積極，每逢曼聯比賽都會喺網上留言支持，淨係呢種心態，小豬就值得做領袖啦。同埋，保羅普巴呢個球壇第一高價球員需要被管束吓，佢嘅身體質素、護波畀波都係頂級，但有時會急躁咗啲，自己帶死個波或者畀埋啲醫院波。如果有小豬或者卡域克呢種沙場老將睇住，相信都有助普巴成長。
文：咖喱