娛樂圈喜事重重，吳日言（Yan）同男友（Barry）拍拖17年，原來10月27日已經喺日本沖繩註冊結婚，正式榮升林太。講到求婚過程，Yan前日話：「都有心思嘅，佢叫朋友蒙住我對眼去公園，然後準備咗九十九支玫瑰花同戒指，仲有音樂同燈光。」
Yan話揀沖繩結婚，因為好鍾意嗰度啲教堂，今次大約有三十個親友出席。講到生B計劃，Yan話會努力，但唔係想有就有，要調理身體。問結婚當日有冇變喊包？佢話：「少少啦！我同老公講，以前未必係好好嘅女朋友，但將來會係一個好妻子。」Yan又自爆拍拖以嚟，她曾經變心半年，但始終覺得𠵱家嘅老公最好。
撰文：馮仁昭
