澳洲籍騎師柏寶雖身經百戰，但剛周日（27日）卻自編自導自演一件瘀事，當時佢於沙田第七場騎「太陽喜喜」衝線後突然企起身，望向看台歡呼，好似以為自己贏馬捧走其士盃咁款。實情係「太陽喜喜」影相跑第二，輸咗俾從其內側後上險勝的「勢必跑」。
事隔三日，柏寶今晚一開場即於谷草追數成功，佢於第一場五班1200米再次策騎霍利時馬房「金飯碗」，結果呢匹四歲英國自購馬第三季在港出賽，跑到第21仗爆冷開齋，單Win及組合獨贏A3分別派192.5及26.5元。
「金飯碗」沿途守第七位，直路後上贏半馬位，霍利時表示柏寶發揮出色，「金飯碗」經常排外檔，今次也不例外，幸而柏寶克服阻力順利取勝。此駒演出大有進步，卻有個不良習慣，就係今次衝線時，像跑跨欄賽或障礙賽般，四蹄凌空躍過跑道上的影子跳過終點，似足早前分別於谷草及泥地有相同舉措的「陀飛輪」（姚本輝馬房）及「合拍飛龍」（大摩馬房），其中「陀飛輪」亦是谷草夜賽跳過終點獲勝，今季特別多此情況出現，不知是否燈光有問題，其實對人馬都構成潛在危險。
今場二至四名都係熱門，分別為「盈喜悅」、「踏雪名駒」及「銘記心中」，四重彩派六萬三千幾。