一個禮拜後快活谷舉行國際騎師錦標賽，雷神莫雷拉同雷景勳等好手獲邀參戰，其中雷景勳最近接受訪問，細訴年輕時在南非數度被拒入騎校，差點冇得做騎師，但其實講到童年坎坷，雷景勳拍馬唔及雷神咁慘。
原來雷神係典型的巴西貧民街童，家有五姐兩哥，他排第八，八歲喪父，阿媽唔識字冇嘢做，間屋漏水周圍都係蛇蟲鼠蟻。雷神細個冇人教，不時頑皮向陌生人討錢，晚上又偷人哋啲馬去騎去玩，是差館常客，當時阿媽最怕電話響，驚有人向她講雷神出事死了。
14歲雷神去工廠打工，主管喜歡賽馬，就叫雷神轉行，於是他做了半年馬伕。15歲去聖保羅成為見習騎師，但非常唔順利。第一、二場頭馬都因犯規被DQ，雷神憶述當時坐在地上大哭。練馬師更對他說，若半年內攞不到六場頭馬，就踢他走。結果第六個月最後一天，雷神剛好取第六Win，但練馬師仍説他唔掂，雷神於是賴死唔走。幾個禮拜後，練馬師突回心轉意，肯再教雷神，自此雷神亦突飛猛進，幾年前進軍新加坡及近年在香港，都成為冠軍騎師，公認身手非凡，近乎雄霸香港馬壇。
上季初雷神策「首飾太陽」，直路右手飛甩條鞭，隨即左手凌空接番，再打鞭跑第二，這一幕更似玩雜技，睇到馬迷目定口呆，大呼神乎其技。